Константин Степанович Сердитов Скöр Кöсьта Константин Сердитов чужис

Константин Степанович Сердитов Скöр Кöсьта (Константин Сердитов) чужис июнь тöлысьö Луздор районса Сернöс сиктын 1961 -öд воын. Помалiс ЛГУ-са журналистика факультет. Служитiс армияын. Öнi уджалö Луздорса «Знамя труда» газетын. Йöзöдлiс гижöдъяссö «Войвыв кодзув» журналын, öтувъя сборникъясын. Сылöн кывбуръяс вылö лöсьöдöма сьыланкывъяс. Öнi висьтала: личкис тай мог. Нöшта кута кö, шöри сэк пота. Дыр нин кывъяссö тусь-тусьöн вота. Вывтi сьöктаммис вотöса ноп. (Скöр Кöсьта)

Скöр Кöсьталöн кывбуръяс пыр вöсньыдик кöчвöньöн нуöдöма кыв корсян нырвизьсö. Ёнасö тайö гижысьыс некöн оз и йöзöдчы, аслас петавлiс сöмын кык небöг – «Арся думъяс» да «Ас ордым» небöгы петавлiс неважöн на, 2008 -öд воын. Гижысьлы колö сöмын «личöдны» ассьыс «вотöса нопсö» . «Вотöс» - тайö мöвпъяс, сьöлöмкылöмъяс «ноп» - вежöр. Гашкö, мукöддырйи сiйö личкö гижысьöс, а сьöкыд, пемыд здукъясö отсалö аддзыны петан туй сук вöрысь. Скöр Кöсьта – сиктса морт и, дерт жö, зэв ёна пыдди пуктö, радейтö аслыспöлöс сиктса оласногсö. «Юльса вичко» кывбур буретш та йылысь висьталö. Вичко тайö вежаин. Сиктса олöмсö Скöр Кöсьта öткодялö вичкокöд, сiдзкö, сылы ставыс зэв дона, муса, колана.

Скöр Кöсьталöн небöгъяс «Öтувъя керка» кассетнöй сборникысь (квайт торъя небöгтор), 2001 во «Ас ордым» : кывбур «Юкмöс ва войтъяс» : чукöр. Лэдзöма Абъячой сиктын, 2008 во сьыланкыв чукöр Лэдзöма Абъячойын, 2005 во.

2008 -öд воын петiс «Ас ордым» небöг. Танi öнiя комилöн сьöлöмкылöмыс, чужан кыв да чужан му радейтöмыс. Мам да челядьдыр, чужан сикт да ас горт, ас йöз да ас му , ставыс чуксалö овны, кутö лача бур вылö. Сьöлöмтö вöрзьöдö «Локтi бöр» кывбур. Лирика геройлöн сöвестьыс ас йöз водзын, сикт йöз водзын сöстöм, а сiйö быттьö уджйöза налы. Кывбурын сьöлöмкылöмыс матын быдöнлы, таын и выныс кывбурлöн. «Локтi бöр, и сьöлöм шогöй сылiс, Локтi бöр… Да сибöдан-ö тэ? »

К. С. Сердитов - журналист Комияс пыр олiсны вöр-вакöд öтув. Вöр-ва – сiйö ичöтик чуман. Сы пытшкын чöскыд, лысваöн мыссьöм вотöсыс – пармалöн мичлуныс. А Скöр Кöсьта бура гöгöрвоö да кылö пармалысь гöлöссö, аддзö сылысь юр кольмöдана мичлунсö оз синнас, а сьöлöмнас. Аслас гижöдъясас сiйö сернитö вöр-вакöд. Пармаыс ловзьö! Тайö воссьö «Ар» кывбурын. Нимсö абу сьöктöдöма, ковтöмторсö абу шöтöма. «Лун-лун дженьдаммö шондiлöн ордымыс. Лун-лун содыштö тöлыслöн вын»

Константин Сердитов ЛГУ-са журналистика факультетын велöдчигöн

Сиктса олöм Скöр Кöсьта ёна тöждысьö сиктса олöм вöсна. Аслас гижöдъясас петкöдчö бур сьöлöма мортöн. Зэв ёна вöрзьöдö сьöлöмтö «Юкмöсöй» кывбур. Лыддян сiйöс да юрад бергалö Петр Шучалинлöн сьылöмыс. Сiйö лöсьöдiс Скöр Кöсьталöн кывбуръяс серти сьыланкыв. Тайö висьталö, мый Скöр Кöсьталöн кывбуръяс зэв мелiöсь, восьтöны коми мортлысь этшсö, асвежöртöмсö, олöм вылö видзöдлассö, а, сiдзкö, йиджöны йöз сьöлöмöдз.

Сиктын юкмöс – олöм öшмöс «Ловъя на юкмöс. И öзйö на би!» Горöдан пасöн гижысь торйöдö, мый аскиа луныс ас кианым! Бура тыдалö, мый гижысьöс тайö майшöдлö. Куимысь лирика герой шыöдчö юкмöс дорö: «Юкмöсöй, юкмöсöй, Дыр-ö тэд пычкыны синвасö? Öтнадöн бöрдан лун-вой. Юкмöсöй, юкмöсöй, Вайышт мен чужан му ловъя васö, Мед личöдны сьöлöм дой»

Скöр Кöсьталöн олöм Тайö небöгъясас Скöр Кöсьта быттьö гижöма став ассьыс олöмсö. Быд лоöмтор – шог кöть шуда – зэв пыдö мöрччö сылы сьöлöмас. И артмö кывбур. Мед эськö татшöм енбиа, Коми му вöсна тöждысьысь йöзыс век озырмöдасны миянлысь Чужан мунымöс, югзьöдасны олан визьсö кок туй талялысьяслы. Скöр Кöсьталöн кывбуръясыс кöдзыд тöлын жара ломтысьысь ичöтик бипур кодьöсь. Сылöн кывбуръяс лыддьöм бöрын окота нöшта на ярджыка ломзьöдны коми культуранымöс, мед би киньясыс ылöджык сявкйисны!

Проект лöсьöдöм • Проект лöсьöдiс Кетов Денис, Сыктывкарса канму университет, коми да финн-угор филология кафедра, 333öд группаса студент. Ыджыд отсöг сетiсны ачыс Константин Степанович Сердитов да Абъячой школаса велöдчысь Анастасия Зизганова. Настя лыддис поэт К. Сердитов йылысь сочинение 2010 -öд воын В. В. Юхнинлы сиöм лыддьысьöмъяс дырйи. Уджсö редактируйтiс да бура донъялic кафедраса доцент Остапова Елена Васильевна. • Ставныдлы ыджыд аттьö!